講題：岸邊的陌生人 Stranger on the Shore
經文：約翰福音21章1至19節
講員：李均熊牧師
場合：香港中文大學崇基學院禮拜堂主日崇拜
日期：2025年5月4日
今日是復活節後第三主日，福音經課就是關於耶穌基督復活後在海邊向門徒顯現。一如約翰福音經常運用古希臘劇場的相認場景（recognition scenes），七個門徒——彼得、多馬、拿但業、西庇太的兩個兒子、和其餘兩個門徒，第一眼與耶穌相遇都只是以為他是一個岸邊的陌生人，但在門徒聽從這個陌生人向船的右邊下網，從而打了一網拉不上船的魚獲後，「耶穌所愛的門徒」就認出這個岸邊的陌生人不是別人，就是他們跟隨了三年的主！彼得二話不說，就跳下海游上岸。（經文細節說彼得束上外衣可能只是方便游泳）但上到岸後，整個場景大家都不發一言。反而耶穌——這個岸邊的陌生人，不單殷勤地弄上炭火烤魚和餅，叫大家來吃早餐，又自然地拿餅和魚給門徒吃。沒有一個敢問這個陌生人是誰，因為大家都知道他就是主。接著記載將焦點放在這個大家都知道是誰的陌生人，和尷尷尬尬的彼得之間的對話。吃完了早餐，耶穌問了彼得三次「你愛我嗎？」，彼得答了三次「我愛你」，最後耶穌就呼召彼得「你跟從我吧！」（經文接著是彼得詢問本段另一個主角——「耶穌所愛的門徒」的事情，經課則沒有選用）
返教會一段時間的第兄姊妹對這一段記載應該耳熟能詳。約翰福音的最後一章，也是學者十分關注的研究對象。一來，明明在約20:30-31「耶穌在門徒面前另外行了許多神蹟，沒有記在這書上。但記這些事要叫你們信耶穌是基督，是神的兒子，並且叫你們信了他，就可以因他的名得生命。」已經清楚的寫下一段結語，但不知甚麼原因約翰福音又加入第21章；二來，整晚捕魚毫無所獲，到因為耶穌的說話而獲得特別的漁獲，這種耶穌與彼得相遇的記載，在之前我們也在路加福音５章也讀過類似情節，究竟路加福音和約翰福音相似記載的關係是甚麼呢？這都用了很多學者的筆墨去討論。
不過，講道不是研究報告或教書，所以我就將我看過又認為合理的，關於這段經文的要點給大家講講。也因為講道不是研究報告或教書，我今次用一個比較另類對話的形式和大家分享，可能不會直接明白地講，但大家發揮一下想像力，可能大家的領受又會十分不同。
以下是一段關於年老的「耶穌所愛的門徒」和這老使徒的一位門徒，叫約翰（就叫他小約翰／約翰仔）之間的設計對白，用現代廣東話，模擬一段推斷出來的對話，關於約翰福音21章的寫作情形（大家可以當廣播劇嚟聽）：
老使徒：（對他的門徒）小約翰，你哋前陣時幫我紀錄我哋主基督事蹟嘅福音書我已經睇咗，寫得好好……但係我想最後加返一段關於主復活之後另一次向我哋顯現嘅事情。
小約翰：好嘅，老師。不過，主復活後除咗向啲婦女顯現，同個次向多馬老師顯現之外，仲有另一次向你哋顯現咩？
老使徒：係吖。你咁講，呢次算係第三次嘞。你有無讀過保羅老師個宣教拍檔路加醫生寫嘅，關於主嘅福音書。佢記載過有一件事，就係彼得同我哋一班做漁夫嘅門徒，有一次成晚打魚打唔到，後嚟主上咗彼得架船講，完道之後，叫佢再打魚，打咗好多魚嗰件事 ，你有無印象？
小約翰：當然有。 路加醫生仲話個次個網魚，多到連魚網都差啲裂開嘛！
老使徒： 其實個網魚雖然多，但個網一啲都冇穿冇爛，完好無缺。 我仲記得後嚟數過嗰網魚有153條魚咁多。
小約翰：老師你又會記得咁清楚？
老使徒：因為153 正好就係由1加到17 嘅一個三角形數。就係個啲希臘數學家提出嘅三角形數。你哋唔係對於呢啲算術問題好有興趣嘅咩？小約翰：係喎！又幾得意喎！
老使徒：我相信係有啲意思嘅。你自己慢慢再參透啦。不過我想同你講嘅係，路加醫生應該喺第二度聽到呢件事蹟，跟住佢就將呢段事蹟加咗入佢嘅福音書裏面，等個啲操希臘語嘅猶太信信，同個啲外邦信徒明白大宗徒彼得最初點樣蒙召。不過成件事其實係主復活之後先發生嘅：當個日，我同彼得見到主嘅空墳墓之後，又聽到啲婦女話見到主復活，我哋其實都半信半疑，我諗就係主以前成日話我哋信得太遲。之後，我哋呢班原本住係加利利嘅門徒就返咗加利利，所以當主顯現畀細孖（低土馬）嘅時候，即係多馬老師，我哋其實唔係耶路撒冷。所以你哋寫到20章，之後記載咗啲婦女同細孖見到復活嘅主，但無交待見完空墳墓嘅我同彼得有無遇到復活嘅主，就完咗成卷書，我覺得應該要補充一下，想加返呢件事，順便等其他人知道下路加醫生記載嘅事情其實係有另一個版本。
小約翰：咁路加醫生係為佢教會群體記載主基督嘅事蹟，同我哋為你創立嘅教會而寫呢卷書嘅目的係有啲唔同嘅。
老門徒：無錯，係彼得殉主之後，我就要大家幫我寫呢卷書，為嘅就係等我都返去見主嘅時候，可以話所有同主生活過嘅使徒都唔係度，咁對未見過主，但因為我嘅見證而信主嘅人，就可以透過睇呢卷書而領受上主嘅道，又明白跟從主嘅意思係乜。
小約翰：我哋明白嘅，因為我哋呢啲第二代相信主嘅人，無親眼見過主，但又要相信佢，係比較困難嘅，所以我哋係20章裏面加咗主對多馬老師講嘅個句說話：「你因看見了我才信；那沒有看見就信的有福了。」
老門徒：你哋仲用咗好多篇幅寫主同我哋最後晚餐講個啲嘢，其實都係等大家雖然見唔到我哋呢班同主生活過嘅門徒，仍然能夠彼此相愛，仍然能夠經歷大家見唔到嘅主，因為主留下平安畀我哋，其實亦都代表佢留下平安畀你哋。講開最後晚餐，令我諗返我同你講緊個件事，當我哋打完魚之後，主都係好似係最後一餐同我哋一齊咁一齊食嘢傾談。
小約翰：其實點解個日你哋會走去打魚呢？你哋唔係跟從咗主之後就放低哂啲打魚嘅生意呢咩？
老門徒：啲打魚嘅船同器材係我老竇嘅。講返轉頭，我哋離開咗耶路撒冷，返咗加利利嘅個段時間，唔知係因為太無聊，還是太傷心，定乜嘢原因，有一日彼得突然話要去打魚，好以想放棄再跟從主嘅門徒咁。我哋一班原本做漁夫嘅門徒就話跟埋去，除咗彼得，我同我啊哥、仲有係你哋寫個卷書一開始講嘅拿但業，同埋啱啱趕返加利利，你頭先講嘅多馬老師，仲有邊兩個門徒呢……吖，我都唔係好記得係邊個嘞。總之我記得係七個人分咗兩艘漁船。點知打咗成晚，連魚毛都網唔到。當時天蒙光，天色仲係有啲黑，仲有啲霧㖭，係岸上面有個人突然問我哋「細路！你哋有無嘢可以食㗎」我哋初時以為係出嚟搵早餐嘅鄉親，見到我哋打緊魚以為可以即時攞幾條新鮮烤嚟食，點知我哋其實成晚無收獲。我聽到唔知邊個嬲嬲哋應佢話：「無吖！」點知呢個岸邊嘅陌生人好聲好氣咁講：「你哋將網撒向船嘅右邊，就會有㗎嘞。」於是我哋見都打咗成晚，算係最後一次落網，於是轉向船嘅右邊撒網——點知，個下我哋個個都嚇到呆咗！！
小約翰：發生咗咩事？
老門徒：因為我哋點樣拉，都拉唔返個網上船！我開初以為因為我哋打咗成晚魚，手軟腳軟，所以拉唔返起個網，後嚟發現網裏面擠滿哂都係魚，係我哋打咁耐魚都未見過嘅情影！於是乎我驚覺呢單嘢唔簡單，再向岸上面嗰個陌生人望一眼，就認到嗰個岸上嘅陌生人就係我哋嘅主，於是就大叫起嚟：係主吖！彼得個時將件衫綁咗喺條腰度，佢聽到我咁大叫「係主」，佢就解咗件衫著返上身，就跳落水度游返上岸。我哋其實離岸唔係好遠，約有二三百尺左右，於是我哋就唔將個滿咗魚嘅網拉上船，而直接拉佢上岸。後嚟發現個網一啲破損都無，我就話好似我哋教會咁相愛合一，唔似路加醫生話就嚟要破，可能佢咁講係想提醒佢教會啲操唔同語言嘅信徒唔好攪分裂啩。等佢哋仲話得人如得魚。
小約翰：老師，你又嚟嘞，保羅老師同路加醫生向外邦人傳福音，你就多啲向猶太人傳福音，但啲猶太人咪仲煩過啲外邦人。
老門徒：我知道嘅，你哋寫個卷書都講到啲猶太人好唔明白我哋嘅主。哈，哈，唔同使徒係有唔同嘅召命嘅。
小約翰：咁，彼得老師呢？雖然佢已經為主殉道，但路加醫生講到好似彼得老師因為見到咁誇張嘅魚獲，而話自己係罪人，而主當時就叫佢跟從佢，咁你講個次事情又係咪咁？
老門徒：嗯…..（陷入深深嘅沉思）
小約翰：老師，老師，你點吖？
老門徒：我諗返起你哋寫個卷書。你哋由第13章寫彼得到20章完結嘅時候，寫到彼得好似講嘢做事成日唔經大腦咁，佢份人其實唔係咁嘅。
小約翰：老師你又有無發覺，我哋每次寫彼得老師出場，你都會同場出現㗎！而且我哋係好尊敬大宗徒彼得嘅，但係寫成彼得係咁，一來係我哋成日聽你講彼得老師係一個真誠直爽嘅人物，另方面係想提醒我哋第二代嘅信徒，無論係教會位置係高還是低，都可以將真性情係主面前敝開。
老門徒：無錯，彼得係我哋嘅領袖，並唔係佢特別有手段，而係佢對主嘅真誠感動我哋，反而有時講嘢做事隨心而發，更加令我哋覺得佢係亳無機心，係真心能夠代表我哋，成為我哋嘅發言人。反而加略人猶大……唔好提佢嘞。講返我同你講主向我哋顯現嘅事，我覺得復活主係特別為彼得而係岸邊向我哋顯現。我成日諗，主其實復活之後可以直接升天見返佢天上嘅父，我成日講佢道成肉身，所以復活嘅佢可以即時升天，唔再受肉身嘅困鎖，唔再會有傷痕痛楚，亦唔再需要肚餓食早餐。但我哋嘅主唔單只選擇道成肉身，係肉身復活之後亦選擇仍然留係世上四十日先升天，為嘅就係幫助我哋係主受苦時同時所經歷嘅創傷。先係向一班婦女，細孖多馬，然後向我哋幾個，特別係大宗徒彼得，為嘅就係幫助我哋由創傷中走出嚟，而明白主復活對我哋每一個相信佢嘅人嘅意義。我仲記得，個次食完早餐之後，主就問咗彼得三次「你愛我嗎」，不是正好提醒彼得佢曾經三次唔認主嗎?後嚟彼得同我講返，個日如果唔係主好似一個陌生人咁突然出現，可能會走咗去無面見主。其實主每次問彼得「你愛我嗎？」彼得都亦清楚回應話他是愛主嘅，他的心一直沒有改變過。主跟住三次同佢講類似嘅說話，「你餵養我的小羊。」「你牧養我的羊。」「你餵養我的羊。」表明主不但沒有計交彼得三次唔認佢，更係我哋面前肯定佢要接任主作為群羊大牧人嘅職責。我諗主咁樣係我哋面前問佢三次，又委任佢三次，不單止係恢復大宗徒彼得嘅信心，更加係恢復我哋對佢作為我哋領導角色嘅信心。你諗下，彼得佢曾經三次不認主，總會有啲人對佢作為大宗徒大牧者有一定懷疑。佢在生時未必有人會講啲乜，而家佢殉主，唔係我哋中間，可能會有啲多事之徒或貪圖教會權力嘅人會講佢壞話，破壞佢為主建立嘅教會。我要你係我在生時記低呢件事，就係為咗避免心直口快嘅彼得被人中傷詆譭。
小約翰：你雖然咁講，但我哋幫你寫完呢卷福音書之後，大家係咪真係會咁諗？
老門徒：唔緊要，小約翰。你要記住，我作為主所愛嘅門徒，為這些事作見證，係等相信主嘅信徒知道，主復活之後唔係就完成咗在世之功，升天走咗去。主嘅復活同顯現係要我哋無論咩境況，都知道佢會挽回我哋，幫助我哋，無論係我哋犯錯，又或係創傷嘅低谷，佢都唔會唔理會我哋。
小約翰：老師，我會再細心想下你見證嘅主復活顯現嘅深意㗎啦。
老門徒：唔……講咗咁耐，我都有啲攰啦，其他嘅細節，過幾日我再同你講清楚。到時你再諗下點樣編修入去你哋卷福音書啦。你要記得，無論遇到咩嘢困難，主已經復活，能夠按我哋嘅需要，顯現、幫助我哋，就好似佢向彼得顯現一樣。
